BAGHMARA: Rim·gittangako man·gipa gue badinggipa mande saksani manggisiko Sombar salpaksachibara, South Garo Hills a·jani Nongalbibra jolo donggipa Jadi song sambaoniko man·aha.
Ia mandeara Assam Goalpara a·jao donggipa Krishnai-oni bilsi 50 ong·gipa Sudhanshu Das ong·achim aro ia mandeni depantegipani Nongalbibra-o FIR ka·ani gitade, ia mandeko re·anggipa February 19 tariko ma·sina man·gijagipa manderang rim·gittangaha ine chanchichipengachim.
Ia mandeni gimaani bidingo FIR ka·ani ja·man police-rang am·sandianirangko dakenba, South Garo Hills a·jao donggipa Rewak Songmong-ni Mantang N Marak minggipa mandeko rim·na man·aha indiba matnangako man·enggipa gipin sakgni manderangde kate dongkuenga ine police-rang kobor on·aha.
“Ia mandeko police-rang sing·sandion, gue badingenggipa Sudhanshu Das-ko rim·gittangani ja·man so·ote galaha ine ua ku·rachakaha aro ja·mano uni dilanichi so·ota man·gipa mandeni manggisiko man·aha. Ia manggisiko Jadi-on post mortem ka·aha aro pilak nanga kamrangko matchotani ja·man manggisiko uni nokdangni manderangna pakwate on·ataha,” ine South Garo Hills a·jani Superintendent of Police (SP) Rituraj Ravi parakataha.