A·dokni bilsi 50 gapaniko maniani bak gita taridapgipa U Soso Tham Auditorium-ko kulie on·a

SHILLONG: Mongolbar salo, a·dokni Chief Minister Conrad K Sangma, Meghalaya a·dokni bilsi 50 gapaniko maniani bak gita taridaptaigimin U Soso Tham Auditorium-ko kulie on·angaha aro ia auditorium-ni pakmarango tarigipa noksarangko oprake on·angjolan baksana ‘Museum on Wheels’-koba a·bachengate on·angaha.
Taridaptaigipa auditorium-ko kulie on·angani somoio a·dokni Chief Minister, jinmana aganprakengon, auditorium-ko nitoatna gita pakmarango a·dokni ong·telaigipa noksarangko salahani gimin Arts & Culture department-ko mittelpilangenba, ian gipin biaprangoni re·baenggipa manderangna a·dokni nitoani aro aiao inmangipa ong·aniko mesoke on·ani gita ong·gen ine parakangaha.
“U Soso Tham auditorium-o an·ching sorkarini aro gipin nangchongmotgipa program-rangkoba ong·atenga indiba ia auditorium-ko ru·utbea bilsirangna maming taridapani gri donengachim. Da·alo ia auditorium-ko nambate tarie on·an baksana auditorium-ko nitobatatahani gimin ian an·chingna mingsa jakkaltobegipa gam gita ong·gnok,” ine Sangma aganaha.
Meghalaya a·dokni bilsi 50 gapaniko maniani bak gita ia U Soso Tham auditorium-kosan ong·aigija a·dokni dingtang dingtang biaprango donggipa auditorium-rangkoba taridapengaha ineba Chief Minister, ia tom·anio parakataha. Shillong songjinmani Mawdiangdiang-o rikenggipa Shillong International Centre of Performing Arts & Culture (SICPAC)-ko da·o bakan matchotna siengaha ineba Chief Minister parakataha.
A·dokni bilsi 50 gapaniko maniani bak gita dingtang dingtang program-rangko ong·atna sorkari manchisoahaoba Covid-19-ni a·sel bang·bata program-rangkon ong·atna man·jaha ine an·tangni suk ong·gijaniko parakatengon, “An·ching an·tangtangni daka rikaniko ripinge a·gilsakna mesokengon chadamberangnaba uamangni changa sapanirangko a·gilsakna mesokna cholrangko on·na nanga,” ine Sangma aganaha.
Changgipa sapgipa chadamberangna, an·tangtangni changa sapanirangko mesokna cholrangko on·na gita sorkari, Arts & Culture-ko tang·doatna rake kam ka·gen ineba Chief Minister, ku·rachakaniko on·angaha.
Ia taridaptaigipa auditorium-ko kulie on·angani somoio a·dokni Deputy Chief Minister Prestone Tynsong, South Shillong-ni MLA Sanbor Shullai aro sorkari official-rangba dongpae bak ra·angaha aro Chief Minister baksa dingtang dingtang ki·taprangkoba oprake on·angjolaha.

Get real time updates directly on your device, subscribe now.

Comments are closed.