TURA: West Khasi Hills a·jani Nengchigen songo silchidare ra·bitgipa manderangni dakchakanichi songni manderangko ka·mikkenate niam gri koela bikotenganina badi ka·ako man·gipa manderangni kosako ta·raken ja·kuko de·china gita Nengchigen songni manderang, a·dok sorkario dabiangaha.
Nengchigen songo silchidare ra·bitgipa manderangni dakchakanichi Alnet Marak, Clington Marak, Pandit Momin, Toban Marak, Nazim Ali, Lipson Momin aro Pangseng Sangma, manderangko ka·mikkenate koelarangko bikotdrae ra·enga ine adita salrangna skangsan, Nengchigen songni Nokma Kristina G Marak, police-rangna FIR ka·doangahachim ine nikna man·a.
Indake ong·genchimoba, ia manderangni kosako police-rang maming ja·kurangko de·jaengani a·sel songni manderangna kenchakna nangani ong·enga ine parakatenba, ia manderangni kosako ta·raken ja·kuko de·china songni manderang didiataha.
“Ia manderang da·oba uamangni cho·gimin koela a·koloniko koelarangko bikotenga aro salantian uamang ching maharani a·aoniko truck 10-mangni gita koelarangko salenga. Iani bidingo chinga adita salrangna skangsan badi ka·ahachim aro adita kilometre-ni sambaon Anti Dacoity camp-ba dongachim indiba police-rang mamingkon dakjaenga,” ine Nengchigre songni Nokma Kristina Marak parakataha.
Marak-ni parakatani gitade, silchidare ra·bitgipa manderang ua aro uni abitanggipaona re·bachenge ka·mikkenatanirangko dakaha aro niam gri koelarangko bikotna a·bachengaha.
“Chingko ka·mikkenatani gimin police-rang badi ka·oba uamangni kosako maming ja·kurangko de·na jechakenga. Police-rangba ia manderang baksa jak dongani giminan chingni FIR ka·anirangkoba ra·chakna jechakenga. Chingni Shallang-ona re·ange FIR ka·ani somoioba police-rang, batesa ia manderangko okamatpilaha. Police-rangan iandake dakenga ong·ode chingara sano ka·dongkuna man·gen,” ine Nokmani abitang sing·doangskaaha.
Uamang abisako niam gri koela badingenggipa manderang chadrapaha indiba police-rang, uamangko chadrapanio jak donggipa manderangoni mongsonggipa Alnet G Marak-ko rim·kujaenga ineba parakataha.
Nokmani parakatani gitade, badi ka·ako man·gipa manderangoni Alnet Marak-de apsan songonin ong·achim indiba songni kosako ong·gija kamrangko ka·skaengachim.
Ia mandeara a·bachengode bol badinge cha·gipasa ong·achim indiba songtango koela nikani ja·mande ua ong·gija dake koelarangko badinge cha·na a·bachengaha aro silchidare ra·bitgipa manderangkoba songona rimbaaha ine Nengchigre songni Nokma parakataha.