TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ni dilanichi, gital Executive Committee (EC)-ko chalaina gita Sombar salo Meghalaya a·dokni Governor Satya Pal Malik ra·chakmanaha.
Ia gital Executive Committee-o rimnapako man·gipa MDC-rangoni saksade Congress doloni United Democratic Party (UDP)-o napanggipa Ashahel D Shira aro sakgipinara Congress doloni Trinamool Congress (TMC)-o napange ja·mano National People’s Party (NPP)-o napanggipa Stevie Marak ong·a.
Ia gital EC-ni gipin membor-rangara Deputy CEM Nikman Ch Marak, Jengjal-ni MDC Grahambell A Sangma, Asanang-ni MDC Anseng A Sangma, Independent MDC Arbinstone B Marak, NPP-ni Henen R Sangma, Independent membor Nathawal S Marak, NPP-ni Crozier G Momin aro NPP-ni sakgipin MDC Sengbath R Marak ong·a.
Grahambell aro Anseng Sangma adasade, a·dokni chief minister aro NPP-ni national president Conrad K Sangma-ni boningtangrang ong·skaachim.
GHADC-ni gital CEM Rakesh Sangma-kode Garo Hills gimikon dingtang dingtang dolrang jegaltokskaengachim aro CEM-ni kamoniko ra·galpilchina dabitokskaengachim.