SHILLONG: Meghalaya Cement Cess Act, 2010-ni ning·o man·gipa kajinarangoniko sorkari 30 percent-ko, Shillong Civil Hospital-o cancer sagiparangko sana bananio nanggipa bosturangko brena jakkalna gita Meghalaya sorkari chanchiaha.
Court-ni rai on·gipako chinga ra·bijawa, court-ni rai on·a gita chinga kamrangko ka·gen ine Chief Minister Conrad Sangma, Meghalaya High Court-ni order on·gipani bidingo aganaha.
Pa Sangma, jean Finance portfolio-koba jako ra·engachim, indakeba aganaha je, Court-ni order, a·dokni revenue ba kajina man·anio nangchakegen indiba namgninade kam ka·aigen, ua agandapaha.
Court-ni rai on·a gitan chinga kam ka·gen aro 30 percent tangkarangko koros ka·gen, Chief Minister aganaha.
Meghalaya Cement Cess Act, 2010-ko a·doko ra·gata intal Sorkari, batanggimin bilsi 12-onin kajinarangko man·enga ine Chief Minister aganaha.
Ia Meghalaya Cement Cess Act, 2010-ra niamna batanga ine Chief Justice Sanjib Banerjee aro Justice W Diengdoh mangni ge·sa division bench, re·anggipa February 9 tariko parakataha aro ge·gni cement company-rangoniko kajina ra·gipaoniko 20 percent-ko walpilchina aro 30 percent-ko Shillong Civil Hospital-ni cancer wing-na jakkalchina gita a·dok sorkariko aganaha.
