TURA: South West Garo Hills a·jao Rerapara C&RD Block-ni gital building-ko rikna gita Bristibar salo, a·dokni Chief Minister Conrad K Sangma-ni jakchi pangchakaniko songe on·angaha aro ia pangchakaniko songe on·anganio Chief Minister-ni Adviser Thomas A Sangma, Boldamgre-ni MDC Stevie Marak aro South West Garo Hills a·jani dingtang dingtang officer-rangba dongpae bak ra·angaha.
Rerapara C&RD Block-ni gital building-ko rikna pangchakaniko songe on·angani somoio a·dokni Chief Minister jinmana aganprakangengon, ia gital building-ko rikna gita gong kror 2.25 tangkarangko sorkari chame on·aha aro kamrangko bakan a·bachenggnok ine parakangaha.
Ia gital building-ko somoi gita matchotatchina kamko jako ra·e ka·enggipa contractor-rangko didiangengon, kamrangko somoi gita matchotatna man·na gita kamrangko name nirokchina Rerapara C&RD Block-ni BDO-ko didiangaha.
Meghalaya a·dok gimikni dam 46 block-rangon namdapataniko ra·bana gita sorkari, gong kror 120-ko chame donaha ineba ia tom·anio Chief Minister parakataha.
“A·dokni bang·bata block-rangon office nokrang aro gipin nangchongmotgipa kolrang dongjaenga ine chinga nikahani gimin a·dok gimikni dam 46 block-rangon gital nokrangko rikna aro office-rangko namdapatna gita sorkari, gong kror 120-ko chame donmanaha,” ine Sangma aganenba, ia kamrangna tender-ko March-April jani gisepon on·gnok ine parakataha.
Meghalaya a·dokni dingtang dingtang biaprango, gital block aro civil sub-division-rangko bikote on·china dabienggipani gimin janapatengon, gital block aro civil sub-division-rangko nangani kri bikote on·na gita sorkari, cholrangko nipilanggen ine Chief Minister parakataha.