SHILLONG: Cheristerfield Thangkhiew-ko so·otani mamlako sandienggipa Justice T Vaiphei-ni dilenggipa inquiry commission, ia mamlako re·baenggipa jagittamni gisepon matchotna jotton ka·enga.
Sonibar salo Justice T Vaiphei, Cheristerfield Thangkhiew sagini manggisiko postmortem ka·gipa Medical Officer-ko sing·sandiaha. Ia mamlao am·sandianiko basako matachotna man·gen iani gimin tale agana man·kujawa indiba re·baenggipa jagittam somoini gisepon matchotna ka·dongsoenga ine Justice Vaiphei aganaha.
“Am·sandianiko ta·rakatna nangnikenga, uni gimin chinga chuttini salrango neng·takgija kam ka·enga ineba parakataha.
Ia mamlako March 11 aro 12 tariko knaatanggen, inquiry Commission, Cheristerfield sagini nokdangni manderang jemangan obosta ong·ako mikrontanchi nike sakki ong·giparang ong·a, uamangko sing·sandigen. Commission, sorkarioni sakkirangkode sing·sandia matchotaha.
Commission sorkarini sakbonga sakkirangko sing·angaha. East Jaintia Hills SP Jagpal Singh Dhanoa, jean re·anggipa bilsi August ja 13 tariko Shillong Massar -o operation-ko dilangahachim, ukoba sing·angaha.
Minggipin February 20 tariko, ia mamlako sandianiko matchotna sorkari, commission-na jagittamni somoiko on·dapaha.
Re·anggipa bilsi August 16 tariko a·dok sorkari, ia mamlako sandina ge·etaha. HNLC-ni gitcham dilgipako police dolrang so·otani gimin Shillong-o so·sojengjeng ong·ani gimin ia mamlako sandina ge·etaniko on·ataha. Uandake am·sandiani bak gita, chairperson, an·tangba February 5 tariko sianggipani nokona Mawlai, Kynton Massar-ona re·angaha. September ja 9 tarikoni hearing-ko a·bachengataha.
