SHILLONG: Meghalaya BJP, Rakesh Sangma-ko GHADC-ni CEM chokkioniko ra·galna dabianio chakpaaniko parakataha.
“Rakesh Sangma-ko CEM chokkioniko ra·galna dabianiko party-ni karyakarta aro memborrang gimikan chakpaa ine Meghalaya BJP president Ernest Mawrie aganaha.”
BJP-ni iandakgipa ja·kuko de·aniara NPP baksa bakrimanio nangchakejawa ine sing·anina Mawrie indine aganchakskaha, “District Council aro State-o bakrimaniara namen dingtanggrika, niatgenchimode JHADC-o BJP-ni membor opposition-o donga, uandake GHADC-oba BJP-ni saksa memborko EM-o donataha aro sakgipin memborko opposition-o donataha.”
Rakesh Sangma-ko GHADC-ni CEM songako namnikjae jegale Garo Hills-ni dingtang dingtang bakrango jegalaniko dakangaha. Jingjengatgipa dolrangoni sinjetaniko man·e Rakesh Sangma an·tangan Sombar salo, uni kamko watna tik ka·aha.
