TURA: Chief Minister, Conrad K Sangma, Sonibar salo kror 5.4 koros bon·e rikgipa gital artificial turf football playground -ko Tura Chandmary-o Chief Minister-ni Advisor Thomas A Sangma, West Garo Hills -ni DC Ram Singh- uamangni dongpaanio parakate on·aha. Uandake sorkari office-o dal·dalgipa biapo donge kam ka·gipa officer-rangba bak ra·angtokaha.
Playground-ko parakate on·ange, “ia football playground-ko parakate on·achi jolotangoniko mikkangchi bang·en football star ba football-o niksenggiparangko nikna man·anggen ine ka·donganiko janapata baksa chief minister, galleries-ko rikna kror gittam baten tangkako sanction ka·aha ineba u·iataha.
Garo Hills a·jao games sports ba kal·susaniko namdapatna re·mikkangengon, indoor swimming pool rikanikoba ia bilsion matchotgnok, Tura District Auditorium-ko nambate taridapenga, jekon March jaode kamko matchotgen ineba CM, aganaha.
Iarangna agreba Tura Dakopgre-o kror 150-ni gital Convention Centre-cum Auditorium-ko rikgen. Tura-ni dambri ramabibra – Chandmary, Ringrey, Hawakhana aro Araimile bibrako nitobatatna ba namdapatna kam ka·anggen jena kror 20 tangkako jakkalna chamataha. Smart Tura Town Project-ni ning·o kror 13-ni road project aro state-of the-art Street Light Project-o kam ka·anikoba ta·raken a·bachenggen ineba CM aganaha.
Iarangni gisepon North Tura constituency Babadam-o kror 280-ni Hunar Hub ba skill centre-ko rikgen, jena Union Minority Minister, mikkang ja March jao pangchakaniko songgen. Tura-ko nitobatatna Garbage-to-Energy-koba a·bachengatgen, indake Mechanised Cleaning System-na tender-ko ta·raken watgen, ine chief minister parakataha.
Chief Minister-ni Advisor, Thomas A Sangma-ba tom·anio bakko ra·e aganprakaton, Chief Minister-ni Garo Hills-o astro turf football playground-ko parakate on·ani gimin de·mittelaha. Ua apsan salon South Tura MLA Cup Tournament 2022-ni opening match-koba a·bachengataha.
Uandake Tura-ni DC, Ram Singh aro Govt’ Boys’ Higher Secondary School, Tura-ni Principla Sengje A Sangma- uamang mittelpilani kattarangko on·angskaha.
