SHILLONG: GHADC-o da·aoni CEM-ni mamlani bidingo manderangko dilsretenga aro ian NPP aro uni bilakbaani kosako political-ni gita didiatgipa dongani gimin ong·enga ine A·dokni NPP ku·wattimgipa Williamnagar MLA, Marcuise N Marak Sonibaro aganaha.
GHADC-o ong·enggipa obostarangni gimin Chief Minister aro NPP party-o maming nangpaani dongja indiba jegalgiparang changdule jegalaniko dakaha chief minister-ko stadium-ko oprakna ramako champengtokaha, ian nitoani ong·ja ineba NPP-ni ku·wattimgipa aganaha.
Namanan re·mikkangengjok aro council-ko kulina nanga maina CEM-ko MDC-rangnan democratic-ni bewalo seokaha ine jegalgiparangna u·iatahachim aroba CEM-ko ra·galnanoba office-rangko kulina on·na nanga maina unonisa kamrangko ka·na man·gen ine u·iatmanahachim indakoba iarang pilakko ma·sioba chief minister-ni kosakosa chrik a·bokaha, unigimin ian political-chi didiatako man·gipa ong·a aro uamang NPP-ko minge chrik a·bokaha, Marak aganaha.
GHADC, ian a·joltangni ong·a, jingjengatani a·sel iano bang·a kamrangko bangki dongenga aro kajina man·anirang gimaenga ine aganengon, “jingjengataniko dontongchina anga uamangko mol·mola aro namgipa kamna ja·ku de·na, unon pilakan tik ong·angaigen,” NPP dilgipa aganaha.
MDC-rang asonggrime uamangni neng·nikanirangni gimin chanchirimgen aro chanchirimani ja·mano uamangna u·iatgen ine janapengon, “Uamang ia mamlao manderangko dilsretna jotton ka·enga indiba Chief Minister Conrad Sangmani dilani nangrime rikgipa sorkari pangnan manderangni ku·rangko knachaka aro mamingsaloba drae manderangni namnikgijako dakja’’ ineba ua aganaha
Koborrango gita, A·chik a·songni pilak biaprangon uni kosako jegalanirangko dakengahani gimin Babelapara MDC aro Garo Hills Autonomous District Council-ni Chief Executive Member, Rakesh A Sangma, uni post-oni ong·katnaba donga.
Rakesh-ni kam wataniko official gita parakatkujaoba, ua Sombaro kamtangko watgen aro gital CEM-ko seokna cholwate on·gen ine koborrango parakaha.
AITC, Garo Hills a·jao bilakrorobaenga ingipani bidingo sing·anina aganchakengon, ‘‘Ian kakket ong·srangja, GHADC-o da·o ong·enggipa obostarangni gimin, manderang indake aganaba donga, ian political-ni gita didiataniko man·engani giminsa,’’ NPP dilgipa aganaha.
“NPP bilaka aro ia ong·enggipa obostarangchiede bilgriatako man·jawa Garo Hills-o uandake a·dok gimiko sorkari bang·a namdapatani kamrangko ka·enga,” Marak agandapaha.
Ia obostarang ba mamlarang re·baenggipa 2023 Assembly poll-o NPP-na neng·nikaniko ra·bajawama ine sing·anina aganchakengon, “Iachi NPP mamingdakeba ja·donggaatako man·jawa. NPP bilaka, anga darang party-ni kosakoba aganja, ian democracy ong·a uamango jegalna bil dongaia,” Marak agandapaha.
