SHILLONG: Ukraine-o jachange donggipa Meghalaya-oni sak 24 poraigiparangko naljoke jitatna state BJP, Ministry of External Affairs, Home aro Defence-na chittiko seatenga.
“Ukraine-o an·ching sak 24 bi·sarang jachange dongna nangengani koborko man·aha, uni gimin uamangko naljokgipa biapona jitatna ba a·dokona naljoke rimbana chittiko Home Affairs Ministry, Defence aro External Affairs Ministry-na seatenga, ine State BJP president Ernest Mawrie, koborna parakaha.
Meghalaya-oni Ukraine-ona poraina re·anggiparang golmal ong·enggipa Ukraine a·songo jachange dongtokenga. Sorkari uamangko naljoke rimbapilna ma·mong baksa agangrikatenga.
Kobor man·soani gitade Zaporizhzhia-ni badiaba bunker ba nape chakani biapo dongnue dongenga, mitamrang college-ni basement-o dongtokenga.
The Shillong Times-ni kobor ra·timgiparang baksa agangrikatao sak jachange donggipa chatri Daphibalahun Lyngdoh Mawlong, hostel-o dongtokenga ine aganataha. Ukraine-o so·sojengjeng ong·ani ja·man city authority, student ba poraigiparangko college basement-o dongchina ge·etaha.
Sak 250 student-rang basement-o dongtokenga. Uandake gipin naljokgipa biapona jitatna agananirang dongama ine sing·aton, da·odipetde border-ko ga·batna ba naljokgipa biapona jitatani gimin mamingkon agankujaenga, jeo donga unon dongkuna aganaha ine parakataha.
Student-rang Zaporizhzhia-oni Romanian border-ona bus gita songrea ong·ode, konta 10 ba 12 somoi nanggen.
Sakgipin student Richie Kalra-ba, “uamang Indian embassy-ni ge·etaniko man·sona nichake dongenga ine aganataha.
Ukraine-o jachange donggipa India-ni manderangko ma·mong sorkari naljoke rimbapilna jotton ka·enga.
Sorkari, Ukraine-o jachange donggipa poraigipa aro gipinrangko dakchakna helpline number – 9366066565 aro 9863257261 –ko a·bachengataha.
A·dok sorkari, Ukraine-o jachange donggipa poraigiparangni list-koba wataha aro uamangko naljoke rimbapilna MEA baksa agangrikatenga.
