SHILLONG: National People’s Party (NPP) dol, gam-jinrangna aro bilna mikbokrakani a·selsa Meghalaya a·doko aro mongsongbate Garo Hills-o da·ororo so·sojengjeng ong·anirangko nikna man·enga ine All India Trinamool Congress (AITC)-ni dilgipa Mukul Sangma matnangataha.
Rakesh Sangma-ko GHADC-ni CEM songanina jegale dingtang dingtang dolrangni jingjengatenggipani bidingo janapatengon, Garo Hills-o ong·enggipa obostarangko sorkari, maming so·sojengjeng ong·ani grian namatna man·aiachim indiba agre tangka paisarangna aro bilna mikbokrakani a·selsa iandakgipa obostarangko nikna nanga ga·akenga ine Sangma parakataha.
“Conrad Sangma, an·tangni jongsarigipa Rakesh A Sangma-na GHADC CEM-ni kamko on·engani a·selsa Garo Hills-o so·sojengjeng ong·anirangko nikna man·enga. Iako NPP-chi dilenggipa sorkari maming neng·nikani grian namatna man·aiachim indiba uamang agre tangka paisarangna aro bilna mikbokrakani a·selsa so·sojengjeng ong·anirangko nikna nangenga,” ine AITC-ni dilgipa aganaha.
Rakesh Sangma, an·tangan CEM-ni kamko watgnok ine parakatani ja·manoba Garo Hills-o jingjengatenggipa dolrang, maming see on·anirangko man·kujaengani gimin jingjengatanirangko dontongkujaengachim aro Sonibar saloba, Chief Minister Conrad K Sangma-ni Chandmary-o robol kal·chakgipa field-ko kulie on·na re·angani somoio, bang·bea manderang Chandmary-o nisan gisimko ra·e uni kosako jegalanirangko daksotokahachim.
“Da·o dipet Rakesh Sangma, CEM-ko kamko watgen ine chingna maming see on·anirangko man·kujani gimin chinga jingjengatanirangko dontongkujawa aro Sombar saloba GHADC office-o jinma tom·e jegalangkugen,” ine Association for Democracy & Empowerment (ADE)-ni president Dalseng Bira Ch Momin parakataha.
Adita salrangna skangsan, Chief Minister-ni South West Garo Hills a·jaona re·angani somoioba dingtang dingtang dolrang Ampati-o nisan gisimko ra·e jegalanirangko daksotokahachim ine nikna man·a.