TURA: Garo Hills Autonomous District Council (GHADC)-o chief executive membor (CEM)-ni kamko Rakesh Sangma-ni watangani ja·man Siju constituency-ni MDC Albinush Marak, uni biapko ra·rikskana gita Sombar salo, Deputy Chairman-ni kamko wataha ine kobor on·aha.
Garo Hills gimikon jegalanirangko man·tokahani a·sel GHADC-ni CEM Rakesh Sangma, kamtangko watna draataniko man·ahani gimin uni biapo Siju GHADC constituency-ni MDC Albinush Marak-ko NPP-chi dilenggipa Executive Committee-ni membor-rang, gital CEM-na minge donatskaahachim.
Gital CEM-na mingako man·gipa Albinush Marak, da·o dipet GHADC-ni deputy chairman ong·engachim ine nikna man·a.
Re·anggipa bilsini April jao deputy chairman-ni kamna election-ko ong·atanio ua All India Trinamool Congress (AITC)-ni MDC ong·enggipa Rinaldo K Sangma-ko chee GHADC-ni Deputy Chairman ong·engachim.
Indake ong·engon, Sombar salo Albinush Marak, Deputy Chairman-ni kamko wataha aro GHADC-ni gital CEM ong·e Executive Committee-ko rikani bidingo a·dokni Governor-ko gronge agangrikna gita gipin MDC-rang baksa Shillong-ona re·angaha ine kobor on·timgiparang parakataha.
