SHILLONG: Meghalaya a·doko suspend ka·a man·gipa Congress MLA-rangko nokchakna skangba name nichengna nanggen ine United Democratic Party (UDP)-ni dilgiparang parakataha.
Congress dolni mitam MLA-rang, UDP-o napna nangniktokenga ine koborrangko man·soenggipani bidingo sing·on, uamang UDP-ni dongimin niamrangko chu·sokatgenma chu·sokatjawa uko nichengna nanggen ine UDP-ni general secretary Jemino Mawthoh parakataha.
“Bang·a dilgiparangan chingni dolo napna sikenggiparang donga indiba kattade chinga uamangko nokchakama nokchakja uasa ong·aigen,” ine Mawthoh aganaha.
UDP-o napna sikaiani gimin pilakankode uamang nokchakna man·jawa ineba UDP-ni dilgipa aganaha.
“Uamangko rimnapna skangba chinga uamangni kamrangko, dakbewal-rangko aro on·kanganirangko name nichengna nanggen. Pilakna bateba chinga uamang chegipa ong·na man·ama man·jawa, uko nina nangao ga·akgen,” ine Mawthoh, Congress MLA-rangni gimin aganaha.
MDA-o bakrimenggipa dolskarangkon NPP cha·minokna jotton ka·enga ine matnangenggipani gimin janapatengon, “Ian election-ni bilsi ong·engaha aro pilakan election-ni bewal-kosa ja·riktokengaha. Election sepangengahani gimin da·o manderang dolsaoni dolgipinona katna a·bachengtokgnok aro uandakgipa ma·manti kamrangko nikna man·gnok. MLA aro MDC-rangba an·tangtangni namnikbatgipa dolrango bakrimna a·bachenggnok,” ine UDP-ni general secretary parakataha.
UDP-ko bilakbatatani bidingo janapatengon, uamang UDP-ni pilak mongsonggipa bipekrangko kam ka·atna a·bachenggnok ine Mawthoh aganaha.
Gital GHADC CEM-ko niam gita seokgen:
Chief minister indakeba aganaha je Garo Hills Autonomous District Council (GHADC)-ni NPP MDC-rang Siju-Rongara-ni MDC, Albinush Marak-ni bimingko gital CEM-na mingaha.
“Gitalgipa CEM-ko ain gita aro dakbewal gita seokgen,” Pa Sangma aganaha, ua agandapkua, jedakgipa chanchianikoba dakbo uan manderangni uandake council-ni namgninan ong·gen.
“Dakbewal gita dakna inoba uan MDC-rangni skaosa pangchakaigen,” ua aganaha.
GHADC CEM Rakesh Sangmako ra·galchina chrochro dabianirang, mijal Sombar salni bako Babelapara MDC-ni kam watani ja·mano jripangaha.
