SHILLONG: Ukraine a·songo poraie jachange dongna nangenggipa Meghalaya a·dokni sak 11 chatro chatrirang, New Delhi songjinmaona tom·tome sokbaaha ine kobor on·aha.
Re·anggipa Robibar salosan a·dokni Chief Minister Conrad K Sangma, New Delhi-ona re·angenba, Ukraine a·songo jachange dongenggipa sak 30 chadamberangni bimingrangko a·songni Foreign Secretary-na on·eahachim aro ia chadamberangko biaptangtangona naljoke sokatbachina ma·mong sorkariko didiahachim.
Indake ong·engon, da·o sak 11 chatro chatrirangde maming a·sel nanga gri a·songtangona sokbapilna man·ahani gimin bangki dongkuenggipa chadamberangkoba noktangtangona sokatbana gita kamrangko ka·engaha ine a·dokni Chief Minister parakataha.
Koborko on·ani gitade, Ukraine a·songo jachange dongenggipa India a·songni manderangko rimongkatbana gita Hungary, Poland, Slovac Republic aro Romania a·songni MEA dolrang, Ukraine a·songni simarango donggipa dingtang dingtang biaprangona re·angengaha.
“Ukraine a·songo jachange dongkuenggipa a·dokni manderangko biaptangtangona sokatbana gita anga Union Home Secretary aro External Affairs Minister baksa agangrikjringenga. Meghalaya a·dokni pilak chatro chatrirangkon tom·tome rimbapilna man·na gita anga Ukraine a·songni samba jolo donggipa a·songrango dongchina ge·etako man·gipa sakbri Union Minister-rang baksaba agangrikgen,” ine Chief Minister aganaha.
