RESUBELPARA: Sericulture-ni kamrangchi Agri Entrepreneurship Development-ni bidingo agan-talate on·na gita re·anggipa Mongolbar salo, salsani training program-ko North Garo Hills a·jani District Sericulture Office-o ong·atangaha.
Ia training program-ko a·bachengatani somoio North Garo Hills a·jani Additional Deputy Commissioner ZJ Sangma, mongsonggipa sokgipa ong·e jinmana aganprakangengon, sericulture ba muga jo·ongrangko jile kildingko tariani kamrangara gama ge·anio panchakgipa kamrangan ong·ani gimin bading chiwale cha·enggipa manderangna janggi tangani cholrangko aro man·dapanirangko on·na man·gipa chol ong·a ine parakangaha.
Iandakgipa training program-rangko ong·atanichi bading chiwalenggipa manderangni kamrangko nambatatna dakchakani ong·e man·dapanirangko on·na dakchakaniba ong·gen ineba Sangma aganaha aro sorkarini on·enggipa cholrangko ra·e an·tangtangni janggi tangani gadangko namdapatchina didiangaha.
Ia program-ko ong·atanio NEHU Tura campus-ni ning·o donggipa Incubation Centre-ni Nodal Officer Dr Shashi Kumar-ba jinmana aganprakengon, ia centre-ni ning·o jako ra·e ka·enggipa kamrangni gimin talate on·angaha.
Ia program-o District Sericulture Officer Sanre G Momin-ba dongpae jinmana aganprakengon, ia program-ko ong·atani bidingo talataniko on·angenba, bading chiwale cha·enggipa manderang, membership fee-rangko gamahaon, eri jile cha·ani ma·manti bosturang, jekai tray, torch light, tarpaulin aro uandakgipa bosturangko man·gen ine parakangaha.
Ia training program-o skie on·anggipa gipin manderangara, Tura CSB-ni Scientist B Dr Indira Kumar, NEHU Tura Campus-ni Pro-Vice Chancellor G Singaiah, Guwahati MSSO-ni Scienitist D Dr Sarkar aro gipinrang ong·a.
