SHILLONG: Meghalaya a·dokni SSA skulrango skigiparang, jabongani dormaharangko man·kujaengani gimin jingjengatanirangko daktokengon, skigiparangna October aro November jagnini dormaharangko on·chengna sorkari ku·rachakataha.
Budbar salo, Meghalaya SSA Schools Association (MSSASA)-ni dilgiparang baksa tom·e agangrikangani ja·man skigiparangna jagnini dormaharangko on·chengna gita a·dokni Education Minister Lahkmen Rymbui ku·rachakaniko on·angaha.
SSA skulrango skigiparang, jabongani dormaharangko man·tokkujaengani gimin Budbar salo, Polo Ground-oni Secretariat-ona jinma re·jomange jingjengatahachim indiba skigiparangko police-rang, Raj Bhavan sambao champengsoaha aro dilgiparangkosan Secretariat-ona re·angna on·aiaha.
Uandaken, MSSASA-ni dilgiparang, association-ni president Aristotle C Rymbai-ni dilanichi, a·dokni Education Minister-ko grongeaha aro ia tom·anio Education Minister, skigiparangna jagnini dormaharangko on·chengna ku·rachakaniko on·ataha.
“Chingna Education Minister-ni parakatani gitade, skigiparangna jagnini dormaharangko on·chengna gita Finance department, Education department-na adita tangkarangko on·na ku·rachakaha aro uandaken sorkari, chingna jagnini dormaharangko on·chengna ku·rachakataha,” ine Secretariat-o Education Minister-ko grongani ja·man MSSASA-ni president Aristotle C Rymbai parakataha.
Rymbai-ni parakatani gitade, December, January aro February jagittamni dormaharangkoba ma·mong sorkarioniko gnigipa installment-ko man·soahaon on·na gita Education Minister ku·rachakaniko on·ataha.
Meghalaya a·dokni SSA skulrango skigiparang, re·anggipa October jaonin jabongani dormaharangko man·tokkujaengani gimin batanggimin somoirangoba dingtang dingtang dake jingjengatanirangko dakangahachim ine nikna man·a.
Batanggimin bilsirangonin a·dok sorkario gong kror 104 tangkarang dongkuenga ineba skigiparang, ia tangkarangko jakkale skigiparangni dormaharangko on·china dabitokengachim.