GHADC-ni gital chairman-na Gasuapara MDC-ko minga

TURA: Garo Hills Autonomous District Council (GHADC)-ni gital chairman-ko seokna gita da·al Sukrobar salni bako election-ko ong·atengon, National People’s Party (NPP)-chi dilenggipa MDC-rang, Gasuapara-ni MDC Sengchim M Sangma-ko an·tangtangni candidate-na minge donangaha aro opposition doloniba Rongrong GDC Constituency-ni All India Trinamool Congress (AITC) MDC Rinaldo K Sangma, chairman-ni biapna susana gita an·tangni nomination-ko Bristibar salo on·angaha.
GHADC-ni gital chairman-ko seokna gita da·al salni 11:00 bajio special session-ko ong·atenga aro ia session-ko West Garo Hills a·jani Deputy Commissioner Ram Singh dilanggen.
GHADC-ni gitcham chief executive membor (CEM) Rakesh Sangma-ko seokani ja·man, Garo Hills gimik jegaltokahani gimin adita salrangna skangsan ua kamtangko wate on·ahachim aro da·o GHADC-ni deputy chairman Albinush Marak-ko NPP-chi dilenggipa Executive Committee-ni membor-rang, gital CEM-na biming minge donskaahani gimin uaba deputy chairman-ni kamko watangskaahachim.
Indake ong·engon, GHADC-ni kamrangko chalaidilna man·na gita gital chairman-ko seokna dingtangmancha session ba tom·aniko ong·atchina a·dokni Governor ge·etaniko on·angahachim.
GHADC-ni gital chairman-na mingako man·enggipa MDC Sengchim M Sangma, 2021 bilsini GHADC election-o Gasuapara constituency-oni susae, United Democratic Party (UDP)-ni Devier M Sangma-ko cheahachim.