SHILLONG: Congress doloniko ra·gala man·gipa sakbonga MLA-rangni bakrimeani gimin Meghalaya Democratic Alliance (MDA)-o maming gisik sagrikna nangani katta dongjaha ine Sukrobar salo, a·dokni Chief Minister Conrad K Sangma parakataha.
MDA sorkario Congress dol baksa melibatsranggijagipa BJP dolba bak ong·paengachim ine nikna man·a.
Iani bidingo kobor ra·timgiparangna talataniko on·angengon, MDA-o bakrimegipa sakbonga MLA-rangni kosako Congress dol ja·kuko de·aha aro da·o ia MLA-rang suspend ka·ako man·gimin MLA-rang ong·e Congress MLA-rang ong·jahani gimin MDA-ni ning·o maming gisik sagrikna nangani katta dongjaha ine Chief Minister parakataha.
“Chinga pilakan a·dokna dangdike on·na gitasa MDA-o bakrimahani gimin saksa sakgipinni gisepo gisik sagrikna nanganiko anga an·tangde nikjaha aro chinga pilakan apsan ong·e kamko ka·angaigen,” ine MDA sorkarina chakpaanirangko on·engani gimin sakbonga MLA-rangko mittelpile Chief Minister aganaha.
Sakbonga MLA-rangni MDA sorkario bakrimeaniara namen namgipa ja·ku de·ani ong·aha ine janapatengon, ian a·dokni nanganirangko sorkarini chu·sokatenggipa kamrangko mesokani gitasa ong·skaenga ine Chief Minister aganaha.
Sakbonga Congress MLA-rangni MDA-o bakrimeanina a·dokni BJP dolde suk ong·gijaniko parakahachim aro iani bidingo talataniko on·china gita Chief Minister-koba aganahachim.
