SHILLONG: National People’s Party (NPP)-chi dilenggipa MDA sorkari, namroro silroroatani kamrangko ku·rachake gipin dolni dilgiparangko rime katna jotton ka·enga ine Sukrobar salo Oppositon All India Trinamool Congress (AITC)-ni dilgipa Mukul Sangma matnangataha.
AITC-o da·on be·gruna a·bachenganiko nikna man·engaha ine Conrad Sangma-ni agangipa kattarangni gimin sing·on, uamang an·tangtangan gipin dolni dilgiparangko rime katnasa jotton ka·engani gimin uni agangipa kattarangna ua maming moatako man·jawa ine Mukul Sangma parakataha.
“Assembly-o jegaltimgipa dilgiparang dongjachina gitasa uamang Opposition-ni MLA-rangko rime katna jotton ka·enga indiba ian a·songni dongimin niam gitade ong·jaenga,” ine Sangma aganaha.
Bilo ong·enggipa manderangan democracy-ni gamchataniko nisie galenga ine janapatengon, ian 2023 bilsini ja·manoba uamangni bilo ong·angkuna nangnike opposition-ko bilgriatna jotton ka·aniko mesokanisa ong·enga ine Sangma parakataha.
Sakbonga Congress MLA-rangni MDA sorkarina chakpaaniko on·ani bidingo janapatengon, iandake dingtang dingtang dolrangni gisepo bakrimna skang political dolrangni ning·on agangrikchengani dongna nangachim indiba sorkari, ropesa MLA-rangko sale katna jotton ka·enga ine AITC-ni dilgipa parakataha.
2018 bilsio ong·anggipa obostani gimin janapatengon, ua somoio Congress dolni dilgipa MM Danggo-na civil sub-division-ko on·gen ine ku·rachakesa rime kataha aro uko MLA ong·aoniko watgalchina gitaba didina man·aha ine Sangma parakataha.
