SHILLONG: Palna on·gija beng·e donggipa Yaba tablet-rangko Bangladesh-ona badingsrukatna jotton ka·enggipa mande saksako South West Khasi Hills district-o rim·aha, jeni daman lak bongamang ong·nasiachim ine BSF-ni koboro janapataha.
BSF personnel aro a·dok police dolgni nangrime sandianiko dakmitingo cha·ue badingatna jotton ka·enggipa mandeko Robibaro rim·aha jeonikon rong 982 Yaba tablet-rangko man·aha ine chel·chakgipa doloni aganaha.
Dosi donggipa sakgnioni saksade kate jokaha koboro janapataha. Rim·a man·gipa mandeko, ra·sekgimin bosturang baksa a·dok police-na pakwatataha ineba koboro janapataha.
