TURA: Ro·ong salruragipa truck garirang, nangchongmotgipa lekkarang grisa Tura jilla gita re·ruraenga ine Tura-ni MDC Bernard N Marak-ni matnanganina Western aro South Western Division-ni DFO Rupankar Marak talataniko on·angaha.
Garo Hills-o bang·en ro·ong quarry-rangko niam gri chalaienga aro nangchongmotgipa lekkarang grisa Tura jilla gita ro·ongrangko salruraenga ine Tura-ni BJP MDC Bernard Marak matnangatenba, iani bidingo ja·kurangko de·china Meghalaya High Court aro National Green Tribunal (NGT)-ko didiatahachim ine nikna man·a.
Iani bidingo talataniko on·angskaengon, Garo Hills gita Bangladesh a·songona ro·ong salangenggipa truck garirang, transit permit (challan)-rang gnangsa salenga aro iako department-ni gita nirokjringenga ine DFO parakataha.
Nangchongmotgipa lekkarangko on·ani ja·manosa aro ia lekkarangko name nipilani ja·manosa Dalu aro Mahendraganj gita ro·ong salruragipa garirangko re·angna on·enga ineba DFO parakataha.
Ia nangchongmotgipa lekkarangko on·na man·jagenchimode ia biap damgnio donggipa Land Custom-rangan ro·ong salgipa garirangko re·angna on·jawa ineba DFO Rupankar Marak talataniko on·angaha.
Ia biaprang gita salangenggipa ro·ongrangara niamo pangchake bikotgimin ro·ongrangan ong·a ineba ua parakataha.
DFO-ni talatani gitade, ia apsan ro·ongrangkon, Ganol Hydro Electric Project aro da·o tarienggipa Tura-Dalu rama baksana dingtang dingtang kamrangnaba jakkalenga.
Walni somoirango ia truck garirangko niam gri re·angna on·enga ine matnanganirangna West Garo Hills a·jani Deputy Commissioner aganchakaniko on·angskaengon, salni somoirangode garirang apchangket ong·engani giminsa ia truck garirangko walni somoio re·na on·skaenga ine parakataha.
