SHILLONG: Meghalaya a·doko sorkarini health centre-rango kam ka·enggipa doctor, nurse aro gipin health worker-rangoniba bang·an Covid-19-ni tikako su·e ra·tokkujaengani gimin Sombar salo, All India Trinamool Congress (AITC)-ni MLA HM Shangpliang, a·dok sorkariko sing·doangaha.
Iani bidingo Assembly-ni budget session-o sorkariko sing·doangengon, IIPH Shillong-ni report-o parakani gitade, sorkarini health centre-rango kam ka·enggipa sak 93 doctor-rang, sak 468 nurse-rang aro sak 434 non-medical staff-rang COVID-ni tikarangko su·e ra·tokkujaenga ine Shangpliang parakataha. IIPH Shillong-ni parakgipa report-ni gimin janapangkuengon, private hospital-rangode sak 43 doctor-rang, sak 144 nurse-rang aro sak 147 non-medical staff-rang tikarangko su·e ra·skakujaengani gimin obostarang namkalbatengkua ine Shangpliang parakataha.
COVID-19-ko warachakanio tikarangko su·e ra·aniara namen nangchongmotgipa ong·ani gimin sorkari, iani bidingo mikrakatanirangko on·na jotton ka·enga ine ua ma·sia ineba AITC MLA aganaha.
Shangpliang-ni parakatani gitade, manderangko tika su·e ra·china sorkari draengoba, doctor aro nurse-rang an·tangtangan tikarangko su·e ra·na gong·skatokjaengachim. Iandake sorkari hospital-rango kam ka·enggipa manderangan tika su·e ra·tokjaenga ong·ode bang·a manderangan sorkarini kamko sing·dotokgnok ineba ua aganaha.
Iani skang, Assembly-o sing·anina aganchakaniko on·angengon, Meghalaya a·dok gimiko tika su·e ra·kugijagipa sak 2,505 health worker-rangoni sak 2,456-de sorkari hospital-rango aro sak 48-de private hospital-rango ong·a ine a·dokni Health Minister James Sangma parakataha.