Garo Hills-ni dingtang dingtang biaprango Women’s Day-ko manianga

TURA: A·gilsakni gipin biaprango gitan Women’s Day ba me·chikrangni salko Mongolbar salo, Garo Hills-ni dingtang dingtang biaprangoba maniangaha.
South Garo Hills a·jao ia salko District Legal Services Authority (DLSA)-ni gita Baghmara-ni Pioneer’s Secondary School-o manidilangaha aro ia manianio Baghmara jolo donggipa dingtang dingtang biaprangoni me·chikrang dongpae bakko ra·angaha.
Ia manianio South Garo Hills DLSA-ni Secretary Daniel S Marbaniang, jinmana aganprakangengon, songsalo me·chikrangni gamchatgipa ong·ani gimin aganangenba, me·chikrangba pilak kamrangon jakgitelgiparang ong·na gita skie ra·na nanga ine parakangaha. Me·chikrang, an·tangtangnasan ong·aigija songsalna simsakgiparang ong·na nanga ineba ua aganaha.
Ia tom·anio South Garo Hills a·jani Additional District Medical & Health Officer Naomi M Sangma-ba jinmana aganprakangengon, me·chikrangko pangnan songsalo bilgribatgiparang ine channa indiba me·chik aro me·asani gisepo maming dingtanggrikani dongja aro me·chikrangba pilak kamrangon chu·sokgipa ong·na man·a ine talataniko on·angaha. Me·chik aro me·asani gisepo dingtanggrikani dongja ine ma·sigenchimosa mande palbadinge cha·anirangkoba komiatna man·gen aro songsalo tom·tomani aro namroro silroroaniko ra·bana man·gen ineba Sangma aganaha.
Ia tom·anio Baghmara-ni WPSI Namchiba M Sangma-ba jinmana aganprakengon, songsalo me·chik police-rangni dakna nanggni kamrangni gimin agan-talataniko on·angaha.
Apsan daken South West Garo Hills a·jaoba ia International Women’s Day-ko Rangsakona Community Hall-o maniangaha aro ia manianio South West Garo Hills a·jani Additional Deputy Commissioner AVD Shira, mongsonggipa sokgipa ong·e bakko ra·angenba, jolni me·chikrangna mande ra·pilskaaniko dakangaha.
Ia tom·anio Shira, jinmana aganprakengon, batanggimin somoirango an·tangni kam ka·e nikmangimin kamrangni aganangenba, bang·a changon ua me·chikrangko onchepe ka·aniko aro me·chikrangni kosako ong·gija dakanirangko nikna man·aha ine an·tangni suk ong·gijaniko parakangaha.
Ia program-ko ong·atanio dongpae bakko ra·anggipa gipin manderangara, South West Garo Hills a·jani EAC A Ch Momin, EAC VA Sangma, Ampati Women Police Cell-ni SI TG Momin, Ampati DCPU-ni Legal-cum-Probation Officer TD Ch Marak, Ampati-ni Medical & Health Officer Dr NM Sangma aro gipinrang ong·a.