SHILLONG: Meghalaya a·doko lekka porako tang·doatna gita sorkari, skul nokrangko taridape on·na a·bachengengaha ine sorkari a·kangengoba, bang·bata biaprangon lower primary aro upper primary skul nokni obostarang namsrangjaengahani gimin Mongolbar salo, bang·a MLA-rangan Assembly-o suk ong·gijaniko paraktokaha.
Skulrangko chalaiani bidingo Gambegre-ni NCP MLA Saleng Sangma-ba Assembly-o aganangengon, batanggimin bilsignina kingking skulrangko chipe donna nangtokahani gimin bang·bata skulrangon skul nokrang nosto ong·atako man·an baksana skulni bench aro desk-rangko cha·utokaha aro mitamrangde nosto ong·tokengaha ine an·tangni suk ong·gijaniko parakataha.
Gambegre constituency-ni ning·o donggipa bang·a skul nokrangan nosto ong·tokengaha aro skulo bi·sarangni asongchakgipa aro sechakgipa table-rang mitamde cha·uako man·tokaha aro mitamde nosto ong·tokengaha ine Sangma aganaha.
Apsan daken, Mawsynram-ni AITC MLA Himalaya Shangpliang-ba, an·tangni constituency-ni ning·o donggipa bang·bata LP skul nokrangni obostarang namsrangjaengahani gimin an·tangni suk ong·gijaniko parakataha.
MLA-rangni agangipa kattarangna aganchakaniko on·angengon, bang·bata biaprangon skul nokrangko sorkari taridape on·na a·bachengaha aro ia bilsini gisepoba bang·a skul nokrangkon tarina gita sorkari tangka paisarangko chame donmanaha ine a·dokni Education Minister Lahkmen Rymbui parakataha.