SHILLONG: Assam aro Meghalaya a·dokni simarango ong·enggipa golmalrangko namatna gita Congress sorkarini somoio a·dokni gitcham Chief Minister Mukul Sangma, maming ja·kurangko de·jaha ine Budbar salo, a·dokni Chief Minister Conrad K Sangma matnangataha.
Assembly-o Governor-ni aganprakanggipa kattarangna jera ra·grikengmiting somoio aganchakaniko on·angengon, bilsichetna kingking iani bidingo a·dokni gitcham Chief Minister maming ja·kurangko de·jaha aro uandaken ia golmalrang namchipna man·jaha ine Chief Minister Conrad Sangma matnangataha.
A·dok damgnini simarango meligrikna man·jaenggipa biaprangoni damdok jolrangkode da·o a·dok damgnian namgrikaniona ra·bana siengaha ineba ua aganaha.
Sixth Schedule-ko taridapani gimin janapangengon, ‘unscheduled tribe’ kattako a·dok ra·chakna man·jawa ine a·dok sorkari talen ma·mong sorkarina u·iatmanaha ine Chief Minister parakataha.
“Unscheduled tribe kattako chinga ra·chakjawa inen chinga seachi ma·mongna u·iatmanaha,” ine Sangma aganaha.
SSA skulrango skigiparangni gimin aganchakaniko on·angskaengon, ia bilsi bon·na skangan sorkari, SSA skigiparangna mitam dakchakanirangko on·gen ine Chief Minister parakataha.
Chief Minister-ni aganani gitade, dingtang dingtang gadangni skigiparang donga aro skigiparangna a·dok sorkari dormaharangko on·engani gimin bang·a bang·gijasan skigiparangna gro dongkuengachim.
SSA skigiparangko nirok sandianio neng·nikanirangko man·na nangenga ine ku·rachakaniko on·angengon, ma·mong sorkarioniko somoi gita tangka paisarangko man·sojahaon a·dok sorkari neng·nikanirangko chagrongna nanga ine Chief Minister parakataha.
Ia neng·nikaniko Meghalaya a·dokosan ong·ja indiba gipin a·dokrangoba apsan daken chagrongna nangenga ine talatangengon, skigiparangni dormaharangko on·na gita sorkari gipin cholrangoniko jakkalgenchimoba, skigiparangna dormaharangko on·anio bang·en koros ka·skana nangenga ine Sangma aganaha.
