SHILLONG: 2022-2023 bilsina Gross State Domestic Product (GSDP)-ni 4.5 percent ong·gipa gimik gong kror 1849-ni deficit budget-ko Budbar salo, a·dokni Chief Minister Conrad K Sangma, Assembly-ni budget session-o parakataha.
Chief Minister-ni parakatani gitade, chu·gimik receipt-rangara gong kror 18,700 ong·enga aro ianoni gong kror 16,035-de revenue receipt aro gong kror 2,665-de capital receipt ong·enga.
Gro donggipa gong kror 2632-ko changale total receipt-ko gong kror 16,068-na hisapaha ine talataniko on·angengon, total expenditure-na gong kror 18,881-ko hisapenga aro ianoni gong kror 15,376-kode revenue expenditure-na aro gong kror 3,505-kode capital expenditure-na hisapenga ine Chief Minister parakataha.
Chief Minister-ni aganani gitade, kror 964-ni loan payment-ko changale total expenditure-na gong kror 17,917-ko hisapenga.
2022-23 bilsina interest payment-ko gong kror 1,110-na aro pension payment-ko gong kror 1,469-na hisapenga ineba ua aganaha.
Ia budget-o gender budget, youth budget aro Sustainable Development Goals (SDG) budget-ko ra·baenga ine talataniko on·angengon, gender budget-na gong kror 2,495-ko, youth budget-na gong kror 1363-ko aro SDG budget-na gong kror 9,182-ko sorkari chamenga ine Chief Minister parakataha.
Ia bilsini GSDP-na gong kror 37,494-ko chamenga ine janapatengon, a·doko economy-ni tang·doaniko nikna ka·dongengani gimin 2022-23 bilsina gong kror 41010-ko hisapenga ine Chief Minister parakataha.
A·dokna chamgipa central tax-ni gimin janapatskaengon, ia bilsini gisepo a·dok sorkarini man·na ka·dongsoenggipa gong kror 5,105-ni pal a·dok sorkari, gong kror 5,851-ko man·soaha ine Chief Minister parakatenba, 2022-23 bilsinade central tax-oniko gong kror 6264-ko hisapskaenga ine talatangaha.
Chief Minister-ni parakatani gitade, Special Capital Assistance Program (SCAP)-ni ning·o dingtang dingtang capital project-rangnaba Union Finance Ministry, gong kror 300-ko a·dokna chamataha.
Revenue deficit grant-na gong kror 1,033-ko, disaster management-na gong kror 76-ko, Autonomous District Council-rangna gong kror 140-ko, Urban Local Bodies-na gong kror 69-ko aro health sector-na gong kror 59-ko a·dok sorkari man·sokugen ineba Chief Minister parakataha.
Special Capital Assistance pool-ko gong kror 15,000-oniko gong kror lak 1-ona ma·mong sorkari bariataha aro ianoni gong kror 614-ko 2022-23 bilsini gisepo dingtang dingtang mongsonggipa kamrangko ra·gatna gita Meghalaya a·dokna chamaha ineba Chief Minister parakataha.
