SHILLONG: Meghalaya-ni jeje song-nokrangonan Saubhagya scheme-ni ning·o bijolirangko sokatangna man·jahachim, uandakgipa song-nokrangko Reform Distribution System Scheme (RDSS)-ni ning·o napatanggen ine Meghalaya Deputy Chief Minister Prestone Tynsong Sukrobaro aganaha.
Je je songrangan Saubhagya scheme ba ugita gipin scheme-rangni ning·o watchangako man·ahachim, anga uamangna ka·dongataniko on·a je, uamangko India Sorkarini a·bachengatgipa RDSS-ni gnigipa gadangni bako man·chapatgen aro a·dokni song-nok damantionan bijolirangko sale on·gen ine Deputy CM, mijalo Assembly-o parakataha.
Tynsong, jean Power portfolio-koba jako ra·enga, chu·gimik DPR-oni bang·en komiatani a·sel bang·a songrangan Saubhagya scheme-ni ning·o watchanggalako man·aha ineba Tynsong aganaha.
Ia Saubhagya scheme-ko jakkalenba A·dokni kona noksiko donggipa pilak songrangonan bijoliko sokatna gita miksongenba detailed project report (DPR) tarie on·china gita batanggimin 2017 bilsion Power Ministry-ko aganman·ahachim ineba Minister aganaha.
Aro ua gitan sorkari DPR-ko pakwataha jeoni korosan Rural Electrification Commission (REC)-ni gita Tg. kror 1,914 sokbaani ong·achim.
Indake ong·genchimoba Saubhagya Scheme-ni ning·o original ba tarimanchagipa DPR-ko REC, Tg. kror 1,189.58-ona komiataha aro uanonikoba Tg. kror 657.05-ona komidapatkuaha, Tynsong aganaha.
A·dok sorkari da·o dipet Tg. kror 600.07 tangkarangko ia scheme-ni ning·i jakkalaha, Minister talataniko dakangaha.
Deputy Chief Minister u·iata je Rerapara block-ni ning·ogipa Bolgangre songo da·o dipet gimiknade bijoliko tikatna man·kujaenga.
Bolganreo donggipa ge 75 nokdangrangoni ge 33 nokdangrang bijoliko man·aha gipin ge 42 nokdangrangonade sokatna man·kujaenga, jerangan Saubhagya scheme-ni skanggipa list-o napangjahachim, Tynsong aganaha.
Unomitingo dongspa songrako basako RDSS-ni ning·o napatgen ine opposition Trinamool Congress legislator Zenith Sangma-ni u·ina ske sing·anina aganchakengon, DPR-ko REC-o pakwatataha ine Tynsong aganchakaha.
Da·omitingo REC, DPR-ko nienga, uamangni nia matchotjokon ra·chakaniko dakchina Power Ministry-ona watatgen, ua agandapaha.
