Resubelpara: Damas jolni manderangni district-o gital C&RD Block -ko rikna dabie memorandum-ko on·ani bidingo chanchirimna, North Garo Hills (NGH)-ni district administration, Resubelpara C&RD Block-ni ning·o ga·akgipa A·king Nokma aro songni Sordar-rangko okamaha.
Da·o NGH-o chu·gimik ge 3 C&RD Block- Bajendoba, Resubelpara aro Kharkutta donga.
March 15 tariko Resubelpara C&RD Block-ni SGSY Hall-o tom·anggen, jeon jinma manderangni melie, Mendipathar-o Damas-ko headquater ba skotong done, gital Block-ko songe on·china dabie Chief Minister Conrad Sangma-na on·gipa memorandum-ni gimin chanchirimaniko dakgen.
Damas-oni adita km-mang chel·gipa Dainadubi aro sepangjolo dongipa manderang, ua jolo gital C&RD Block-ko songna dabie sorkarina bang·a memorandum-ko on·ahachim.
March 12 tariko on·gipa memorandum-o manderang Resubelpara-o donggipa C&RD Block-ko Damas-ona jitchina ong·jaode Mendipathar constituency-o Damas-ko skotong done gital Block-o songe on·china ine dabiaha.
Uandake DRDM -ni project director cum ADC Zenithsky J Sangma, iani bidingo aganataengon, ‘administration, iani bidingo chanchirimna ua jolni gimik Nokma aro Sordar-rangko okamaha,” ine parakataha.
Damas-o gital C&RD Block-ko songani gimin chanchirimna Nokma, Sordar-rangko okama
Date:
Share post:
