TURA: Assam Goalpara a·jao donggipa Damra-oni North Garo Hills a·jao donggipa Bajengdoba-ona dakanggipa ramako ia bilsini Novermber jao matchotgnok ine Sonibar salo, Meghalaya a·dokni Chief Minister Conrad K Sangma parakataha.
Sonibar salo a·dokni Chief Minister, North Garo Hills a·jani Harinkata songona re·ange songni manderang baksa tom·e agangrikengmiting somoio iako parakataha.
Chief Minister-ni parakatani gitade, Damra-oni Mendipathar-ona dakanggipa ramani earthwork ba a·a den·ani kamrangko May jani gisepo matchotgen aro Mendi-Resu ramaoni Bajengdoba-ona WMM-koba May jani gisepo matchotgnok.
“Ia ramako tariani kamrang namen ka·sinenga ine dingtang dingtang MLA-rangni badi ka·aniko man·ahani gimin anga an·tangan kam ka·enggipa contractor-rangko rimbae, sing·sandiaha aro da·alo chinga ia kamko ta·rakbatatna chanchirimaha. Ia ramako tariani chu·gimik kamrang November jani gisepon matchotgnok,” ine Sangma, Harinkata songni manderang baksa tom·anio aganaha.
Ia km 37 ong·gipa ramara, Assam Goalpara a·jao donggipa Damra-oni a·bachenge Damas, Mendipathar, Resubelpara gita Bajengdoba-ona dakbagipa rama ong·achim aro ian North Garo Hills a·jani manderangna mongsonggipa ramaba ong·engachim.
Ia ramako tarianio kamrang namen ka·sinengani jolo songdongenggipa manderangba changni chang ia ramani bidingo sorkarina badi ka·doangahachim.
