TURA: Sonibar salo, a·dokni Chief Minister Conrad K Sangma, Garo Hills-ona re·baani somoio Tura jillako nitodapatna tarienggipa dingtang dingtang kamrangko niangjolaha.
Skanggipao ua Tura-ni Jail Road-o gital rikenggipa water tank-ni kamrangko niangaha aro ia water tank-ko somoi gita matchotatchina district administration aro PHE department-ko didiangaha.
“Ia water tank-ko rikmanahaode Jail Road jolo songdongenggipa manderangnasan ong·aigija samba jolrango donggipa manderangnaba ringani chirangko chu·onga gita on·na man·gnok. Uni gimin manderangni namgnina ia kamko ta·raken aro somoi gita matchotatchina anga ge·etaha,” ine ia biapko nieani somoio Chief Minister parakataha.
Iani ja·man ua Jail Road-ona tarienggipa ramakoba niangjolaha indiba ia ramako tarianio kamrang ka·sinengani gimin an·tangni suk ong·gijaniko parakatenba kamrangko ta·rakatchina ge·etaniko on·angaha.
Tura-ni Araimile bibrao taridapenggipa kamrangkoba Chief Minister niangaha aro kamrangko ta·raken matchotatchina ge·etaniko on·angaha.
Iani ja·man ua Dakkopgre-o taridapenggipa PA Sangma Stadium-koba re·ange nieaha aro ia stadium-ko ia bilsini gisepon matchotatna jotton ka·gen ine parakataha.
“PA Sangma stadium-ko tarichakataonin chinga kamrangko nirokjringenga aro ia bilsio an·ching Meghalaya a·dokni bilsi 50 gapaniko man·engani gimin ia stadium-ko chinga ia bilsini gisepon matchotatna jotton ka·enga,” ine Chief Minister parakataha.
