SHILLONG: Meghalaya a·dokni bilsi 85 ong·gipa gitcham Deputy Chief Minister Rowell Lyngdoh, Robibar salo a·gilsakko watangaha.
1972 bilsio Meghalaya a·dokko man·chengani ja·man skanggipa Assembly election-ko ong·atanio Rowell Lyngdoh sagiba, seokako man·chenggipa membor-rangoni saksa ong·achim.
Ka·tongni saanirangko man·e ua re·anggipa March 3 tarikonin be·enni an·senggijaniko man·e dongna nangengachim aro uandaken March-ni 13 tariko ua, an·tangni jik-dedrangko wate re·angsoaha. Una bon·kame mande ra·pilskaaniko Mongolbar salni 1:00 bajio Lawjynriew-o donggipa Laitumkhrah Presbyterian Mondilini gopramo dakna sienga.
Lyngdoh sagi, changdokna kingking Mawkyrwat Assembly constituency-ni MLA ong·angaha aro changsade KHADC-oba MDC-na seokako man·ahachim.
2015 bilsio deputy chief minister-ni biaponiko ra·galani ja·man ua Congress-oni ong·kate 2018 bilsini Assembly election-na skang NPP-o napskaahachim. Indake ong·genchimoba 2018 bilsio ua chu·sokgipa ong·na man·jaha aro uko re·anggipa bilsio NPP Mawkyrwat-ni president songskaahachim.
