SHILLONG: Meghalaya a·dokni Reservation Policy-ko gital dake taritaipilchina gita North Shillong-ni MLA Adelbert Nongrum-ni mol·molaniko Mongolbar salo Meghalaya Assembly jegalataha.
Assembly-ni jegalatani ja·manoba Nongrum, an·tangni resolution ra·aniko ra·pilna jechakahachim indiba ja·mano jinma vote ka·on, uni resolution ra·aniko chena man·aha.
Iani bidingo a·dokni Chief Minister Conrad Sangma, aganchakaniko on·angengon, Reservation Policy-ko taritaipilani kattara namen rakbegipa aro kenchakna nanggipa kam ong·gen aro ian policy-sa ong·ani gimin name chanchibewalesa kacharini gita ja·ku de·na nanggen ine parakataha.
Iani bidingo political dolrangni gisepo aro MLA-rangni gadango chanchirimchina gita Opposition dolni dilgipa Dr Mukul Sangma-ni ku·pattianikoba Chief Minister ra·chakangaha.
Indake ong·genchimoba, North Shillong-ni MLA Adelbert Nongrum, an·tangni resolution-ko ra·pilna jechakskaaha aro state reservation-ko taripiltaina nangenga ine aganangkuaha.
State reservation policy-ko gital dake taripiltaichina agananiko adita salrangna skangsan, Garo Hills-ni dingtang dingtang dolrangba raken jegalatahachim.