TURA: Azadi Ka Amrit Mahotsav-ni bak gita Budbar salo, National Vaccination Day-ko Tura-ni Circuit House-o maniangaha aro ia salko manianio dingtangmancha health care worker-rangna mande ra·pilskaaniko dakangaha.
Ia program-ko Health & Family Welfare Ministry-ni gita ong·atangaha aro ia program-ko ong·atanio West Garo Hills a·jani Deputy Commissioner Ram Singh, mongsonggipa sokgipa ong·e bakko ra·angaha.
Ia program-ko ong·atanio West Garo Hills a·jani Deputy Commissioner Ram Singh, jinmana aganprakangengon, an·tangtangko on·kange songsalna dangdike on·engani gimin pilak health care worker-rangko mittelpilangenba, mikkangchiba apsan daken jolni manderangna dangdike on·angkuchina an·seng baljokani a·bao kam ka·enggiparangko didiangaha.
Ia tom·anio Tura-ni District Immunisation Officer Dr Ivonne M Sangma-ba jinmana aganprakangengon, 2022 bilsini January jao atchidaldaloni bilsi 5 ong·gipa bi·sarangona kingking Polio-ni skanggipa samrangko on·angaha aro samrangko on·na gita sak 82,223-ko nisan donahaoba 101 percent ong·pile sak 83,460-na samrangko on·na man·aha ine parakangaha.
Samrangko on·anio kamko ka·gipa pilak manderangkoba ua mittelpilangaha.
Bilsi 12-oni bilsi 14 ong·gipa chadamberangna mikkang anti dipet COVID-ni tikarangko dingtang dingtang biaprango su·na a·bachenggnok ineba ua Dr Sangma parakataha.
Ia program-ko ong·atanio Deputy Commissioner-ni jakchi frontline health worker-rangna mittelpilani certificate-rangko suale on·angjolaha.
Ia tom·anio dongpae bakko ra·anggipa gipin manderangara, Additional DMHO Dr JA Sangma, ICDS Tura Urban-ni District Project Officer Chonseng Arengh aro gipinrang ong·a.
