TURA: Re·anggipa Mongolbar salo, West Garo Hills a·jani Deputy Commissioner (Supply) office-ni gita World Consumer Rights Day-ko Dalu C&RD Block-ni ning·o donggipa Thokapara songo manidilangaha aro ia salko manianio fair price shop dealer-rang aro vigilance committee-rangko man·chape songni nokni manderangba bakko ra·angtokaha.
Ia tom·anio MCS officer Cheman D Shira, mongsonggipa sokgipa ong·e jinmana aganprakengon, internet gita korosrangko ka·anio aro bading chiwalanio cha·bokako man·jana gita mikrakchina manderangko didiangaha.
Ia tom·anio South West Garo Hills a·jani Food Safety Officer Sainira S Marak-ba jinmana aganprakangengon, Food Safety-ni bidingo manderangna agan-talate on·angenba, katepe palenggipa cha·anirangko breengon, simsakgiparang ong·china manderangko didiangaha.
Ia salko manianio Legal Metrology Inspector Raksang K Marak-ba dongpae jinmana aganprakengon, Legal Metrology department-ni ning·o ka·enggipa kamrangni gimin manderangna agan-talate on·angenba, bosturangko breengon pangnan name toesa aro bostuko tariani ba galani tarikrangko niesa brechina gita manderangko didiangaha.
Ia tom·anio Supply-ni Superintendent Juniko K Marak-ba jinmana aganprakengon, National Food Security Act 2013-ni gimin aganangenba, da·ororo NFSA-ni cha·ani bosturangko ra·na gita Aadhar-ko nangengahani gimin NFSA-ni namgnirangko man·enggipa mande sakantikon Aadhar-na biming segatchina didiangaha.
Ia tom·anio dongpae jinmana aganprakanggipa gipin manderangara, Dalu C&RD Block-ni BDO Dr Uttam Tamo Ch Sangma, District Commission-ni membor Luna A Sangma aro gipinrang ong·a.
Ia salo UIDAI-ni District Nodal Office-ni gita dingtangmancha NFSA-ni beneficiary-rangna Aadhar-na bimingrangkoba segatangaha.
