TURA: Mingsa namen misilbegipa a·sel ong·anio mijal Bristibar salo, South Garo Hills a·jani Chokpot sub-division-ni ning·o donggipa Silkigre songo me·apa saksa, an·tangni demechikgipakon ka·saninggija dake uni gitokko rasotenba so·ote galaha.
Koborko on·ani gitade, ia a·selni bidingo Silkigre 16A Elaka-ni Laskar Presingson Marak-sa, Bristibar salni 12:30 bajimango, Silkigre-ni police-rangna u·iataha.
Police-rangna koborko on·atani gitade, dos dakgipa mandeara Ampangdamgre Silkigre songni saksa Lindrit N Sangma minggipa mande ong·achim aro ua gisikni gita tik ong·gijagipa mande ong·achim.
Ia mande, an·tangni chonkuenggipa demechik Chidime Ch Sangma-ko so·otani ja·man nokoni katbrange dongenga ineba kobor on·aha.
Me·chik bi·sani manggisiko post mortem ka·na gita civil hospital-ona ra·baaha aro ia a·sel ong·ani ja·man Tura-oni police-rangba ua biapona re·angaha ine kobor on·aha.
Ia mande, an·tangni demechikko so·otani ja·man buringchipakna katangaha aro police-rang da·o uko rim·na sandiengkua ineba ia koborko seatengmiting somoio koborko on·aha.
