SHILLONG: MDA sorkario bakrimgipa dolrang baksa mamingkoba agangrikchenggija sakbonga Congress MLA-rangko rimchaksoani bidingo mamingkoba talate on·kujaengani gimin State BJP, Chief Minister Conrad Sangma iani bidingo agangrikna chanchiaha.
Sakbonga Congress MLA-rangko Sorkarina chakpana on·anio uamangna dongipa niam ainrangni gimin talate on·china gita State BJP, Chief Minister, Conrad Sangma-na seatahachim.
Ia kamrangni bidingo uamang da·alonaba Chief Minister Conrad Sangmani aganchakaniko man·kuja ine State BJP Chief, Ernest Mawrie Sonibaro aganaha.
Iani bidingo ua Sombaro Chief Minister-ko gronge agangrikgen ineba Mawrie aganaha.
Party, mamingdake Congress baksa kam ka·rimna man·jawa ine BJP ku·jokmanjokchim indiba MDA sorkarina chakpaoni ong·katani giminde mamingkoba aganskajachim.
Chief Minister-ni aganchakaniko man·on, mikkangchi maidake re·gen uani bidingo party-ni core committee, BJP-ni Meghalaya in-charge M Chuba Ao baksa chanchirimanggen, Mawrie aganaha.
Unaskang Mawrie indake aganengachim je BJP-ni manderang, Ma·mong ba a·dokni ong·chong gimikan CM-ni aganchakaniko sengtokenga.
MDA sorkarini bak ong·genchimoba, NPP-ni rikdilgipa bakrime rikenggipa MDA sorkari, mainasa sakbonga Congress MLA-rangni bakrimeani bidingo uamangna u·iatjaha ine BJP Meghalaya in-charge M Chuba Ao sing·doahachim.
