Dainadubio jinma re·jome C&RD Block-na dabia

RESUBELPARA: Dainadubio gital C&RD Block-o gital songchina gita songni hajal manderang mijalo ong·katgrime jinma re·jome dabiangaha. North Garo Hills (NGH)-ni Damas-o gitalgipa Block-ko on·nasiengani gimin Dainadubini manderang uamangni songoba gital Block-ko ong·china gita dabiangaha, jean Damas-ara Dainadubi-oni km 10 mangni gita chel·achim.
Ia rally-ko Dainadubi C&RD Block Demand Committee memborrang dakdilangaha, jeon a·jolni wilwilao donggipa manderang dongpaa. Ia committee-ko batanggimin November 2016 bilsion songahachim.
Kharkutta aro Resubelpara ge·gni block-rangoniko bak dakenba Dainadubi Block-ko songchina gita committee dabiaha. Ia gital dabienggipa Block-ni ning·o dam 103 songni ge 6,488 mang nokdangrang aro sak 47,501 mang manderang napangenga.
“Dainadubi, ian Kharkutta aro Resubelpara bijangchio ga·akenga aro iano ge·sa C&RD Block centre-ko dongenchimode manderangna namen namgni ong·gen. Iachi a·jolni manderangna namroro silroroaniko sokbaatna man·gen ine committee-ni president Jaffrey G Momin aganaha.
Dainadubio C&RD Block-ko songchina gita dingtang dingtang dake memorandum-rangkoba Chief Minister, Conrad Sangma, uandake Deputy chief minister Prestone Tynsong, cabinet minister S Dhar aro joltangni MLA-rangnaba on·manahachim.
“Dainadubio gital C&RD Block-ko songgen ine uamangni ku·sikchi aganatanikode chinga man·ahachim indiba iana agre maming ja·ku de·anikode chinga nikkuja. Chingni nangnikaniko dabie chinga da·al re·jomaniko dakaha aro Block man·jaskal dabiangkugen” ine secretary, GD Shira agandapaha.
Uamangni rally Bangsi Apal School Playground-o ong·atangaha, jeon  demand committee dilgiparang, memborrang aro songni nokni bang·a manderang bakko ra·angaha.