TURA: NPP-ni rikdilenggipa MDA sorkari All Garo Hills SSA School Teachers’ Association (AGHSSASTA)-ni, uamango ka·donganiko cha·bokaha ine matnangenba, Association uamangni kam ka·aniko March 17 tarikonin dontongaha aro uamangni ja bongani dormahako on·kujana kingkingde kamrangko ka·kujawa ine parakaha.
Mijalo koborna parakatani gitade, regular class ra·aniko, medical duty-rangko, election, district, block ba CRC level duty-rang ong·chong, uamangni pilak kamrangko ka·tokjana gita AGHSSASTA-ni ning·o skigiparang ku·manchitokaha. A·doko skulrangko kulipil·taiani apsan salonin uamang uamangni kamrangko ka·gija dontongna a·bachengaha.
Skigiparangni man·kugijagipa dormaharangko on·china gita uamangni memorandum on·gipa bidingo a·dok sorkarini nachil songjani gimin AGHSSASTA-ni CEC memborrangni gisepo tom·e chanchianiko dakenba kamrangko dontongna tik ka·angaha.
“Man·kugijagipa ja bongani dormaharangko on·na gita da·alona kingkingba srokarioni maming namgipa aganchakani dongkujaenga. Chinga changni chang memorandum-rangkoba education minister aro chief Minister-na on·manahachim, indiba chingni dabianirangko da·alona kingkingba knachakkuja. Da·o financial year bon·angpiloba chingni dormaharangko mainan da·alonaba on·ja, chinga ma·sinan man·pilja,” Association-ni publicity secretary, Bunbunbirth Marak.
Mija mangmang matchotanggipa Assembly Session-o iani bidingo chanchianiona sokangpilo mangba, chingni man·na nangenggipa dormahani gimin sorkarini mamingkoba jako ra·jaengani gimin skigiparang suk ong·gijanko parakangaha.
Chief Minister Conrad K Sangmani skotong ong·e re·dilenggipa MDA Sorkario chinga ka·dongna aro bebera·na gita man·ja. Chingni neng·nikenggipa obostarangna simsakjani gimin aroba knachakjani gimin, man·gnigipa dormaharangko on·kujana kingking kamrangko dontongangkuna gita chinga tik ka·aha ineba Marak agandapaha.
