SHILLONG: Meghalaya a·dokni Adhoc skulrango skigiparangna dormahako pilak gadangrangon apsan daken bariatchina aro adhoc skulrangko deficit-ni gadangona ra·doatchina gita dabiengon, skigiparangni dabianiko sorkari knachakjagenchimode, re·baenggipa April 1 tarikoni ‘indefinite strike’-ko dakanggen ine Sombar salo, Federation of All School Teachers of Meghalaya (FASTOM)-ni dilgiparang mikrakataniko on·angaha.
Skigiparangni u·iatani gitade, adhoc skulrango skigiparangna re·anggipa 2016 bilsionin dormaharangko baridapattaia dongkujachim aro skigiparang, pilak gadangni skigiparangnan gong 18,000/-ona bariatchina sorkario dabitokengachim.
Da·o dipet adhoc lower primary skulrango skigiparang japrako gong 12,000/-, upper primary skulrango skigiparang gong 16,000/-, secondary skulrango skigiparang gong 20,000/- aro higher secondary gadango skigiparang japrako gong 24,000/- ka·e man·tokengachim.
Indake ong·engon, skigiparangni dabianiko sorkari knachakjaengani gimin Sombar salo FASTOM-ni gita skigiparangni tom·bimonganiko Shillong songjinmani Malki kal·chakramo ong·atangenba, mikkangchiba skigiparangni dabianiko sorkari knachakangkujagenchimode re·baenggipa April 1 tarik dipet skigiparang, somoi donagri kamrangko ka·gija jingjengatangna tik ka·angaha.
Iana skang, FASTOM-ni membor-rang, Secretariat-ona jinma re·jomangna gitaba tik ka·ahachim indiba district administration-ni permission-ko man·jahani gimin re·jomangna man·jaha.
Adita salrangna skangsan Education official-rang, FASTOM-ni dilgiparangko gronge agangrikanio, da·o dipet a·dok sorkari tangka paisani gita neng·nikanirangko man·engani gimin adhoc skulrangko deficit-ni gadangona ra·dona man·kujawa indiba skigiparangni dormahako bariatskagen ine ku·rachakaniko on·angahachim.
Skigiparangna percentage hisap ong·gija pilaknan apsan dake dormahako bariatchina gitaba FASTOM dabiengachim.
Adhoc skigiparangni dabianiko knachakjaode April 1 tarikoni ‘indefinite strike’ ka·gen: FASTOM
Date:
Share post:
