SHILLONG: Re·baenggipa 2023 bilsio Meghalaya Legislative Assembly-ni election-ko ong·atna siengahani gimin ia changode bang·bata seat-rangko chena gita Bharatiya Janata Party (BJP), bakan kamrangko ka·chakatna tik ka·angaha.
2018 bilsini Assembly election-ode BJP dol, seat damgnikosan cheaiahachim indiba ia changode bang·bata seat-rangko chena gita BJP dol rakbate kamrangko ka·sona miksongengaha.
Sombar salo, officer bearer-rang baksa tom·ani ja·man kobor ra·timgipa manderang baksa agangrikengon, Parliament-ni budget session matchota bakan election-na kamrangko ka·sona gita manchiangaha ine BJP-ni state president Ernest Mawrie parakataha.
Election-na kamrangko ka·soani bak gita BJP dol, dingtang dingtang constituency-rango ma·mong sorkarini scheme-rangko name chu·sokatjaengani gimin RTI-ko ka·na manchiangaha ineba Mawrie parakataha.
Mawrie-ni aganani gitade, manderangni badi ka·anirangko man·soani ja·man BJP dol, ma·mong sorkarini dingtang dingtang scheme-rangni gimin RTI-ko ka·na tik ka·angaha.
“Parliament session matchotahaon ma·mongoni bang·a dilgiparangan Meghalaya a·dokona re·bae election-na tarisamsoani bidingo chingna ge·etanirangko on·anggnok,” ine BJP-ni state president parakataha.
Meghalaya a·doko BJP dolko bilakbatatna gita skie ra·echina Assam-ni Chief Minister Himanta Biswa Sarma-ba a·dokni dilgiparangko Guwahati-ona okamatenga ineba Mawrie aganaha.
Jal Jeevan Mission, PM Kisan, kangal cholgrirangna rike on·enggipa nokrang aro uandakgipa dingtang dingtang ma·mong sorkarini scheme-rangna a·dok sorkarisa rasongko ra·enga ine janapatengon, iandakgipa scheme-rangni bidingo BJP-na kam ka·enggiparang, a·dokni manderangna talate on·anggen ineba Mawrie parakataha.