SHILLONG: Meghalaya a·dokni pilak adhoc skulrangkon deficit-ni gadangona ra·dochina dabianiko sorkarini knachakjaengani gimin Mongolbar salo, Federation of All School Teachers of Meghalaya (FASTOM)-ni membor-rang, Shillong songjinmao donggipa Raj Bhavan a·paloni Malki kal·chakramona jinma re·jomaniko ong·atangaha.
FASTOM-ni executive membor Mayborn Lyngdoh-ni parakatani gitade, district administration-ni permission-ko on·anio pangchake ia re·jomanio sak 30 skigiparangsan bakko ra·angaiaha indiba skigiparangni dabianiko sorkari chu·sokate on·kujaskal uamang mikkangchi bilakbate jingjengatanirangko dakangna sienga.
Re·baenggipa April jao adhoc skigiparang pilakan ong·katbae jingjengatanirangko dakna miksongenga aro skigiparangni jingjengatanio chatro chatrirangni ma·a paarangkoba bakrimchina didienga ineba Lyngdoh parakataha.
Budbar sal dipet dolprako skigiparang sakbonga ka·e MBOSE office a·palo jingjengatanggen ineba FASTOM-ni dilgipa parakataha.
Da·o dipet adhoc lower primary skulrango skigiparang japrako gong 12,000/-, upper primary skulrango skigiparang gong 16,000/-, secondary skulrango skigiparang gong 20,000/- aro higher secondary gadango skigiparang japrako gong 24,000/-kosan man·engpiti aro uamang maming gipin man·gnirangba dongpakujaengachim.
Skigiparangni u·iatani gitade, adhoc skulrango skigiparangna re·anggipa 2016 bilsionin dormaharangko baridapattaia dongkujachim aro skigiparang, pilak gadangni skigiparangnan gong 18,000/-ona bariatchina sorkario dabitokengachim.
Indake ong·engon, ia sal somoirango chatro chatrirang, an·tangtangni board porikkarangko sena tarisoengahani gimin skigiparangni jingjengatanichi chatro chatrirangna maming nangchakeani dongjawa ine FASTOM-ni dilgiparang ku·rachakaniko on·ataha.
Adhoc skulrango skigiparangni dabianiko knachakjaengani gimin jinma re·joma
Date:
Share post:
