TURA: Mongolbar salo Garo Hills-ni dingtang dingtang biaprangoba World Water Day-ko maniangaha.
North Garo Hills a·jao ia World Water Day-ko North Garo Hills a·jani Jal Jeevan Mission-ni ning·o donggipa District Programme Management Unit-ni gita manidilangaha aro ia salko manianio dingtang dingtang songni VEC-rang, VWSC-rang aro dingtang dingtang sordarrangba bakko ra·angaha.
Ia program-ko ong·atanio North Garo Hills a·jani Additional Deputy Commissioner ZJ Sangma, mongsonggipa sokgipa ong·e jinmana aganprakangengon, pilak biaprangon chide donga indiba ia chirangara ringna namgipa ong·jani gimin china simsakani bidingo pilaknan mikrakataniko on·na nangengaha ine talataniko on·angaha.
Ia program-ko ong·atanio PHE-ni Executive Engineer aro DSWM-ni Member Secretary AD Sangma-ba jinmana aganprakangengon, ia program-ni gimin jinmana talataniko on·angenba, ian chini gamchataniko aro chini bidingo manderangna agan-talate on·na gita namgipa sal ong·enga ine parakangaha.
Ia tom·anio ua, nokdang ge·antinan ringani chirangko sokate on·na gita ma·mong sorkarini ra·gatgipa Jal Jeevan Mission-ni giminba jinmana talate on·angaha.
Ia program-ko ong·atanio dingtangmancha chini kam aro ro·ongni kamrangko skie ra·enggipa manderangnaba mande ra·pilskaaniko dakangaha.
Indake ong·engon, ia World Water Day-ko Tura-ni College of Community Science-oba maniangaha aro ia salko manianio New Delhi-o donggipa (ERADA), Environment, Climate Change & Natural Resource Management Programme-ni Technical Advisor Sharat Singh, chini gamchatani bidingo aro chirangko ripinge rakkiani bidingo chatro chatrirangna agan-talate on·angaha.
Ia salko maniani bak gita dingtangmancha Poster tarisusaanikoba college-o poraienggipa chatrirangna ong·atangaha.
