SHILLONG: Sombar saloni Mongolbar salona konta 24-ni gisepo Meghalaya a·dok gimiko sak 2 manderang COVID-19 man·dapaha indiba ia konta 24-ni gisepo a·doko COVID man·e sigiparang dongskajaha.
Konta 24-ni gisepo COVID-19 man·dapgipa sak 2 manderangko channe da·o Meghalaya a·dok gimiko COVID-19 man·e dongenggiparang sak 50 gapengaha.
Konta 24-ni gisepo COVID man·gipa sak 2 manderang sakgnian East Khasi Hills a·jao ong·a.
Ia apsan salon gimik sak 6 manderangba Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 92,089 gapskaengaha.
Da·o dipet Meghalaya a·doko COVID-19 man·e sianggiparang gimik sak 1591 gapskaengaha.
