TURA: Jal Jeevan Mission (JJM)-ni ning·o East Garo Hills a·jani Chiading, Dilsekgre, Mandalgipe aro Debakgre songrangona chi pipe-rangko sale on·angahaoba chirang jokjaengani a·sel songni manderang ia program-ni maming namgnirangko man·jaenga ine East Garo Hills a·jani Niksamso A·chik Society (NAS) matnangataha.
NAS-ni vice president Griping Marak-ni u·iatani gitade, manderangni badi ka·anirangko man·soani ja·man uamang, ia songrangona re·ange nion, ia JJM-ni ning·o chi pipe-rangko sale on·ahaoba chirang da·onan jokkujaenga aro chirang jokjaengani a·selan chi pipe-rang maram cha·na a·bachengtokengaha ine nikna man·aha.
“Songni nokni manderangna ringani chirangko sale on·na miksonganiosa ia Jal Jeevan Mission-ko ma·mong sorkari ra·gatahachim indiba ia songrangode chi pipe-rangko man·genchimoba maming namgni dongjaenga maina ia chi pipe-rang gita chian jokbajaenga,” ine NAS-ni dilgiparang parakataha.
Iani bidingo NAS-ni gita am·sandienba nanga gita ja·kurangko de·anggen ineba NAS-ni vice president parakataha.
