TURA: South West Garo Hills a·jani Mahendraganj Bazar jangchio donggipa Prap bolko den·e ia biapo bazar committee-ni office-ko kuliskana miksongenga ine bazar-o dokkan dakenggipa manderang aro samba jolo songdongenggipa manderang, suk ong·gijaniko parakatenba, bazar-o dokkan dakenggipa aro jolo songdongenggipa manderangni namgnina ia bolko den·jachina gita didiattokaha.
Mahendraganj bazar-o dokkan dakenggipa manderangni u·iatani gitade, ia bazar jangchio donggipa Prap bolara ru·uta bilsirangonin dongbaenggipa bol ong·e da·o ia bol namen dal·beaha aro ian bazar-o dokkan dakenggiparangna aro bazar-ona re·bae koros ka·enggipa manderangnaba salakkimaniko on·e ka·sinatna dakchakgipa bol ong·engachim.
Indake ong·genchimoba, re·anggipa March-ni 24 tariko mande saksa ia biapona re·ange ia bolko den·pena jotton ka·ahachim indiba ja·mano ia biapo dokkan dakenggipa manderang aro Mahendraganj police station-ni officer-in-charge, ia mandeko champengatani ja·mansa ua bol den·aniko dontongatchengaha.
“Ia mandeo chinga sing·sandion uko Mahendraganj bazar committee-an ua biapona bolko den·pechina watataha ine chingna aganchakaha. Ia committee-ni miksonganiara ia biapo donggipa Prap bolko den·pee ia biapo committee-ni office-ko rikskaanian ong·enga ineba chinga ma·sina man·aha. Ia prap bolko den·pena gita uamang GHADC-ni Forest official-rangoniko permission ra·chengahachim ineba chinga ma·sina man·aha,” ine Mahendraganj bazar-o dokkan dakenggipa manderang parakataha.
Ia prap bolko bilsiantian Hindu bebera·giparangba olakkitokengani gimin ia bolko den·e galaniara Hindu bebera·giparangni olakkianiko champengatani gita ong·gen ineba samba jolo songenggipa manderang parakataha.
Iani bidingo Mahendraganj bazar-o dokkan dakenggipa aro samba jolo songdongenggipa manderang, GHADC-ni Chief Forest Officer, GHADC Mahendraganj Range-ni Forest Range Officer aro Mahendraganj Police Station-ni officer-in-charge-naba sedoate, ia prap bolko den·na on·jachina mol·molattokaha.