TURA: Mothers’ Union, Tura aro A·chik Literature Society, Tura nangrime 24th March, 2022-o, Bluwin Chisik Sangmani ki·tap “ Poraina Skiani A” jekon D. J. Publications, Tura, chapa ka·aha, uko Garo Hillso donggipa badiaba schoolrango ra·anichi neng·nikanirangko man·enga ine u·iatako man·soani bidingo chanchion, A·chik ku·siko gam·atani aro katta jakkalao meli-ma·gapjani gimin, ia ki·tapko schoolrango bi·sarangna skianiko ka·mao mesokgipa a·selrango pangchake jegalenga:
Ki·tapni jak 16-o on·gipa kattarang, jeaki- KAB, KACH, KAJ, LACH ba iandakgipa kattarangko A·chikkuo gam·anirang dongja. Aro A·chik kattarang j, ch aro uandakgipa gipinrango bon·a dongja.
Ki·tapni jak 15-o “Oikor minggittamchi gam·atani (Menggo)” ine katta bichongko done, menggoni noksako dongipao seanio dingtanga, uano oikor ming 6 (dok) m,e,n,g,g,o, ong·skaa. Iano on·gipa oikorrang, gam·atanirang menggo baksa nangrimani dongja. Kattarang ba oikorrangko nangdime seanirang, jedake HAN, HAP, CHAJ, BAD, CHACH aro uandake gipinrang, menggo baksa nangrimani dongja. Apsandake, jak 13-oba “Oikor minggnichi gam·atani (Do·sik)” ine katta bichongko done do·sikni noksako dongipao seanio dingtanga, uano oikor ming 6 (dok), d,o,s,i,k, ong·skaa.
Rakako tik ong·gipa biapo done seja, jedake “e.ching” (jak 5 & jak 7), “te.gatchu” (jak 11), aro “wa.a” (jak 12).
Ku·sikko poraianio aro chatro-chatrirangna skichenganio ba chu·bata gadango skion, je ku·sikko skienga ua ku·sikko jakkalna nanga. Kosako mesokgimin gita, “Poraina Skiani A” ki·tapo seanirang A·chik ku·sik aro kattarango nangrimani dongja.
A·chik kattako gam·atanio, gipin ku·siko gam·atanirangko napate poraiatna nangja. Kosako mesokgipa a·selrangni gimin “Poraina Skiani A” ki·tapko poraiani ki·tap dake jakkalaniko chinga raken jegala. Ia ki·tapko jakkalanichi A·chikuna aro jatna bang·a namgijanirangko ra·bagen.
