TURA: Tura jillani Mondoltilla gittimo taridapgipa community hall-ko re·anggipa Sonibar salo, a·dokni Chief Minister Conrad K Sangma-ni jakchi nokdonggae on·angaha.
Ia taridapgipa community hall-ko nokdonggae on·angani somoio Tura Municipal Board (TMB)-ni Chief Executive Officer RR Marak, Hawakhana Baptist Mondolini dilgiparang, Mondoltilla gittimni dilgiparang aro jolo songdongenggipa manderangba bakko ra·angaha.
Ia apsan somoion, Tura jillani dingtang dingtang gittimrango chu·onga gita chirangko man·jaengani gimin chi donchakani tengkirangko rikna man·na gita Chief Minister-ni jakchi dingtang dingtang gittimni dilgiparangna tangka paisarangkoba suale on·angjolaha.
