TURA: North Garo Hills a·jaoba principal aro skigiparangni simsakjani a·sel Bajengdoba Higher Secondary School-ni chatri sakgni aro Dainadubi jolo donggipa Bangsi A·pal Secondary School-ni chatro saksa, admit card-rangko somoi gita man·jae Secondary School Leaving Certificate (SSLC) porikkako serikna man·jaenga ine Pedaldoba, Raksamgre aro Bajengdoba-oni Garoland State Movement Committee (GSMC) dolrang parakataha.
GSMC unit-rangni parakatani gitade, ia chatro chatrirangni bidingo social media-rangoniko koborko man·soani ja·man GSMC-ni dilgiparang, chatro chatrirangko grongeon, Bajengdoba Higher Secondary School-ni chatri sakgnian, SSLC test-ko pass ka·enba MBOSE-ni dongimin somoi gitan SSLC porikkani admit card-na form-rangko gapatahachim indiba porikka a·bachengaona kingkingan ia chatri sakgni, an·tangtangni admit card-rangko man·jae porikkako serikna man·jaenga ine ma·sina man·aha.
“Ia chatri sakgni, 2019 bilsionin ia skulo regular students ong·e poraiengachim indiba principal-ni simsakgijani a·sel SSLC porikkako serikna chol man·tokjaengaha,” ine GSMC-ni dolgittam unit-rang parakataha.
Indake ong·engon, Dainadubi jolo donggipa Bangsi A·pal Secondary School-ni chatro saksaba, somoi gitan an·tangni admit card-na form-ko gapatahachim indiba SSLC porikkako a·bachengaona kingkingan admit card-ko man·jae porikkako serikna man·pajaha ine GSMC-ni dilgiparang parakataha.
“Iandake skigiparangni simsakjani a·sel chatro chatrirang, porikkarangko serikna man·jaengani gimin chinga namen suk ong·ja aro ian RTE-ni ning·o on·gimin niamrangko pe·ani gita ong·enga. Iani bidingo magisterial inquiry-ko dakna nangchongmota aro porikka serikna man·jaenggipa chatro chatrirangna porikkako sena cholko on·na nanga,” ine GSMC dabiangaha.
Adita salrangna skangsan, Pedaldoba joloba sak 15 chatro chatrirang, skigiparangni simsakjani a·sel SSLC porikkako serikna man·jaenga ine GSMC Pedaldoba unit parakatahachim.
NGH-oba adita sak chatro chatrirang SSLC porikkako serikna man·ja: GSMC
Date:
Share post:
