TURA: Adita salrangna skang Tura-o National Health Mission (NHM)-ni ning·o donggipa West Garo Hills District Health Society-ni National Tobacco Control Program-ni gita sensitisation program-ko ong·atangenba, ta·makkurangko jakkalanichi mandena namgijaniko ra·bana man·ani gimin aro Cigarette & Other Tobacco Product Act (COTPA’03)-ni bidingo Tura aro Rongram-ni wilwilao donggipa dingtang dingtang development committee-ni dilgiparangna agan-talate on·angaha.
Ia program-ko ong·atanio Tura aro Rongram-ni wilwilao donggipa dingtang dingtang development committee-rangni gimin sak 38 president aro secretary-rang dongpae bak ra·angaha aro uamangna ta·makkurangko jakkalanichi mandena namgijaniko ong·atani bidingo dingtang dingtang official-rang agan-talate on·angaha.
Ia program-ko ong·atanio NTCP-ni District Nodal Officer Dr MD Sangma, power point presentation-ko dake talataniko on·angengon, ta·makkurangko jakkalanichi maikai mandeni be·en bimangna nangchakeanirangko ra·baa aro maini gimin ta·makku jakkalaniko champengna COTPA-03-ko nangachim, uarangni gimin talate on·angaha. COTPA’03-ni bidingo talataniko on·angengon, ia Act ba niamni Section 4-o mande jinmani biaprango ta·makku ringaniko champengaha, Section 6a-ni ning·o bilsi sokkugijagipa bi·sarangna ta·makku palaniko champengaha aro ia niamni ning·o skul aro college-ni 100 yard-ni ning·o ta·makku palaniko champengaha ine Dr Sangma parakataha.
Ia program-ko ong·atanio agan-talate on·anggipa gipin manderangara, West Garo Hills a·jani EAC Ruby R Sangma, DSP Krison Marak, District Medical & Health Officer Dr Bijay Debbarma aro gipin official-rang ong·a.
